Շնչառական օրգանների տուբերկուլոզի տարբերակիչ ախտորոշումը

Շնչառական օրգանների տուբերկուլոզի տարբերակիչ ախտորոշումը

Պրակտիկ տեսանկյունից տուբերկուլոզի տարբերակիչ ախտորոշումը ավելի նպատակահարմար է անցկացնել հիմնական ռենտգենաբանական համախտանիշների սահմաններում՝ թոքարմատի պաթոլոգիայի, սերմնացրված պրոցեսի, սահմանափակ մթագնումների, խոռոչային գոյացության, կլորավուն գոյացության, պլևրալ խոռոչում հեղուկի առկայության:

Շնչառական օրգանների տուբերկուլոզի տարբերակիչ ախտորոշում` ռենտգենաբանորեն սերմնացրված պրոցես.

• Տուբերկուլոզային հիվանդություն                                      
• Սարկոիդոզ                                                  
• Պնևմոկոնիոզներ                                          
• Հիսթիոցիտոզ X                                              
• Ֆիբրոզացվող ալվեոլիտներ
• Թոքերի մետաստատիկ ախտահարումներ
• Բրոնխոալվեոլյար ուռուցք
• Ոչ սպեցիֆիկ բորբոքային պրոցեսներ
• Թոքերի այտուց
• Շարակցական հյուսվածքի դիֆուզ հիվանդություններ                                          
• Համակարգային վասկուլիտ
• Կուտակային հիվանդություն

Ռենտգենաբանորեն`օջախային ստվերներ

• Տուբերկուլոզ
• Թոքի ուռուցք
• Թոքերի մետաստատիկ ախտահարումներ
• Ոչ սպեցիֆիկ բորբոքային պրոցես

Օջախային տուբերկուլոզ և օջախային թոքաբորբ

Օջախային թոքաբորբի սկիզբը և ընթացքը սուր է, մեծ մասամբ մրսելուց հետո է սկսվում` ցայտուն կլինիկական երևույթներով: Ռենտգենյան պատկերի վրա թոքաբորբի դեպքում օջախները թույլ ինտենսիվ են, հաճախ տեղակայվում են VIII, IX, X սեգմենտներում, անոթային նկարը երբեմն արտահայտված է: Հակաբորբոքային բուժումից օջախները կարճ ժամանակում (2-3 շաբաթ) ներծծվում են:

Ռենտգենաբանորեն`թոքային հյուսվածքի մթագնում

• Տուբերկուլոզ ներսփռանքային
• Թոքի ուռուցք
• Թոքերի մետաստատիկ ախտահարում
• Ոչ սպեցիֆիկ բորբոքային պրոցես
• Էոզինոֆիլային թոքաբորբ
• Բրոնխի oբտուրացիոն,կոմպրեսիոն նեղացում ատելեկտազով

Էոզինոֆիլային ներսփռանք                                                

• Ոչ թանձր
• Ոչ հստակ ուրվագծերով
• Անկանոն ֆոկուսային ստվեր
• Էոզինոֆիլիա մինչև 30-90%
• Ալերգենի դրական մաշկային փորձեր

Էոզինոֆիլային ներսփռանքը թոքանկարում երևում է ոչ թանձր, ոչ հստակ ուրվագծերով, անկանոն ֆոկուսային ստվերի նման: Հատկանշական են արյան մեջ էոզինոֆիլների շատացումը մինչև 30-90%, համապատասխան ալերգենի դրական մաշկային փորձերը և հիվանդության կլինիկառենտգենաբանական նշանների անհետացումը կարճ ժամանակում` մինչև իսկ բուժման բացակայության դեպքում:

Ռենտգենաբանորեն` կլորավուն գոյացություն

• Տուբերկուլոզ
• Թոքի ուռուցք
• Թոքերի մետաստատիկ ախտահարում
• Թոքի բարորակ գոյացություններ
• Թոքերի կիստաներ

Տուբերկուլոմա և ծայրամասային քաղցկեղ

Ծայրամասային քաղցկեղն սկզբում որևէ նշանով չի դրսևորում: Տուբերկուլինային փորձերը բացասական են: Այն հաճախ է տեղակայվում 3-րդ, 4-րդ, 5-րդ թոքահատվածներում: Կարևոր է խորխի քննությունը ՏՄԲ-ների կամ ատիպիկ բջիջների համար: Հիվանդության հետագա փուլում մեծանում են տարածաշրջանային ավշահանգույցները, ընդգծվում դեպի դրունքը ձգվող ավշային ուղիները:

Ռենտգենաբանորեն`խոռոչ

• Տուբերկուլոզ
• Ոչ սպեցիֆիկ բորբոքային պրոցես
• Թոքի ուռուցք
• Թոքերի մետաստատիկ ախտահարում
• Թոքերի կիստաներ

Խոռոչային տուբերկուլոզ և քայքայվող քաղցկեղ

Քաղցկեղի քայքայվող ձևը բնորոշվում է հարաճուն հևոցով և կրծքավանդակի ցավերով, երբեմն արյունախխումով: Ախտորոշմանն օգնում է բրոնխադիտումը: Կարելի է հյուսվածքաբանական հետազոտման ենթարկել ներկրծքային կամ ստորանրակային ավշահանգույցները (մետաստազների առկայությամբ դրանք մեծանում են` ի տարբերություն տուբերկուլոզի), ինչպես նաև ստուգել խորխի բջջաբանական կազմը:

Ռենտգենաբանորեն`թոքարմատի լայնացում

• Տուբերկուլոզ
• Սարկոիդոզ
• Պնևմոկոնիոզներ
• Ավշահանգույցների մետաստատիկ ախտահարումներ
• Լիմֆոգրանուլեմատոզ
• Ոչ Խոջկինյան լիմֆոմաներ
• Սիրտ-անոթային համակարգի պաթոլոգիաներ

ՆԿԱՀ(Ներկրծքային ավշահանգույցներ) և սարկոիդոզ

Առավելապես հիվանդանում են երիտասարդ և միջին տարիքի կանայք: Մեծ մասամբ սարկոիդոզն ընթանում է առանց ախտանիշների և հայտնաբերվում է պատահական ֆլյուորոգրաֆիկ հետազոտության ժամանակ: Դեպքերի 20%-ում հնարավոր է սուր սկիզբ՝ Լեֆգրենի համախտանիշով (ջերմության բարձրացում մինչև 38-39 ℃, հանգուցավոր կարմրամաշկություն, հոդացավեր, ներկրծքային ավշահանգույցների մեծացում): Ախտորոշման դժվարին դեպքերում ցուցված է ծայրամասային ավշահանգույցների, իսկ դրանց բացակայության դեպքում՝ մեդիաստինոսկոպիայի պայմաններում ներկրծքային ավշահանգույցների կենսաքաղը և հետագա հյուսվածաբանական հետազոտությունը, որն ի հայտ կբերի սարկոիդոզին բնորոշ գրանուլեմաներ:

ՆԿԱՀ և ԼԳՄ: Լիմֆոգրանուլեմատոզին (Խոջկինի հիվանդություն) բնորոշ է ալիքանման տենդը, ցավերը կրծքավանդակում և վերջույթներում, մաշկի քորը, առատ քրտնարտադրությունը: Երբեմն հիվանդները կարող են գանգատվել հազից, աննշան խորխարտադրությունից, արյունախխումից, նիհարելուց: Ծայրամասային ավշահանգույցներն այդ դեպքում ախտահարված են 90-95%-ով, հիմնականում պարանոցի և վերանրակային շրջանում: Ի տարբերություն տուբերկուլոզի` դրանք զգալի չափերի են հասնում, փայտի ամրություն ունեն, շրջակա հյուսվածքների հետ ձուլված չեն, սովորաբար թարախային կազմալուծման չեն ենթարկվում («կարտոֆիլը` պարկում»): Լիմֆոգրանուլեմատոզի դեպքում ախտահարվում են հարշնչափողային և բրոնխ-շնչափողային ավշահանգույցները, բրոնխ-թոքային խումբը հազվադեպ է ընդգրկվում: Բերեզովսկու-Շտերնբերգի բջիջների հայտնաբերումը հաստատում է լիմֆոգրանուլեմատոզի ախտորոշումը:

Ռենտգենաբանորեն`հեղուկի առկայություն պլևրալ խոռոչում

• Տուբերկուլոզ
• Ոչ սպեցիֆիկ բորբոքային պրոցես
• Պլևրայի մետաստատիկ ախտահարում
• Մեզոթելիոմա
• Սրտային անբավարարություն
• Երիկամային անբավարարություն
• Կրծքավանդակի տրավմաներ
• Շարակցական հյուսվածքի դիֆուզ հիվանդություններ